Tanzania imejiwekea lengo la kufikia uchumi wa USD trilioni 1 ifikapo mwaka 2050, ikitoka kwenye USD bilioni 85.42 mwaka 2024, huku ikipandisha kipato cha kila mtu hadi USD 7,000, kutoka USD 1,277 mwaka 2023.

Hadi sasa, taifa limepiga hatua kupitia ukuaji wa uchumi wa wastani wa 6.2% kwa mwaka, kupunguza umasikini uliokithiri kutoka 36% hadi 26%, na kuboresha sekta muhimu kama kilimo na miundombinu. Hata hivyo, changamoto bado ni kubwa—idadi ya watu inakadiriwa kufikia hadi milioni 140, hali itakayoongeza mahitaji ya ajira, elimu, na huduma za afya.

Sekta ya kilimo, ingawa inaajiri 65% ya Watanzania, inachangia 26% tu ya GDP, ikionyesha tija duni. Ukuaji wa viwanda umesalia kwenye kiwango cha 8% ya GDP, huku kiwango cha mtaji wa rasilimali watu (Human Capital Index) kikiwa 0.39, kikionyesha pengo kubwa la ujuzi. Zaidi ya hayo, changamoto za miundombinu, mabadiliko ya tabianchi, na matatizo ya utawala kama rushwa na ukosefu wa uwazi wa kisheria, vinazuia kasi ya maendeleo.

Ili kufikia Dira ya 2050, Tanzania itahitaji kufanya mageuzi makubwa ya sera, kuimarisha utawala, kuwekeza takriban USD bilioni 200 katika miundombinu, na kujenga uchumi jumuishi unaoongozwa na sekta binafsi na unaozingatia ulinzi wa mazingira.